Поглавјето 29  содржи, скоро исклучиво, законодавство кое е директно обврзувачко за државите-членки. Се состои од царинскиот законик на ЕУ и неговите одредби за спроведување; комбинираната номенклатура, заедничката царинска тарифа и одредбите за тарифна класификација, ослободувањето од царински давачки, суспензии на царината и одредени тарифни квоти, а и други одредби, како што се оние за царинска контрола на фалсификувани и пиратски производи, прекурсори на лекови, извоз на културни добра, како и взаемна административна помош за царински работи и транзит.

Од државите-членки се очекува да обезбедат воспоставување на потребните капацитети за соодветна примена на законодавството, а и врски со соодветните компјутеризирани царински системи на ЕУ. Од царинските служби пак, се очекува да обезбедат капацитети за соодветна примена и спроведување на посебните правила утврдени во сродните области на законодавство, како што е надворешната трговија.