Комитетот за преговори за пристапување на Република Северна Македонија во Европската Унија (Комитетот) е највисоко работно тело на Владата за координација на процесот на преговори за пристапувањето во Европската Унија.
Комитетот ги разгледува и утврдува предлог – преговарачките позиции пред нивното усвојување, расправа и зазема став за најважните прашања кои произлегуваат од преговорите, вклучително и динамиката на преговорите, роковите за хармонизација на националното со законодавството на Европската Унија, како и потребните финансиски средства за исполнување на преземените обврски со преговорите и за обезбедување на капацитети за доследна примена на европското законодавство.
Комитетот го сочинуваат претседателот на Владата кој е претседавач, главниот политички преговарач кој е негов заменик, единаесет членови на владата[i], главниот технички преговарач, два секретари и два заменици секретари[ii].
Комитетот во својот состав ги има овие осумнаесет учесници, а по потреба во работата на Комитетот можат да учествуваат и други членови на Владата, членовите на Преговарачката група, раководителите на работните групи, како и други релевантни чинители, за што одлучува претседавачот на Комитетот, во консултација со главниот политички преговарач и главниот технички преговарач.
Комитетот се состанува најмалку еднаш пред одржување на секоја Меѓувладина конференција со Европската Унија. Предлог за свикување на состанок на Комитетот може да даде било кој член на Комитетот.
Административно – стручна и оперативно-техничка поддршка на Комитетот ја обезбедуваат Канцеларијата на главниот технички преговарач и Секретаријатот за европски прашања.
За својата работа Комитетот одговара пред Владата .
Со денот на влегувањето во сила на одлуката за формирање на комитет за преговори за пристапување на Република Северна Македонија во Европската Унија, престанува да важи одлуката за формирање на Комитет за Евро-Атлантски интеграции[iii].
| Комитетот | |
| Целосно име: | Комитет за преговори за пристапување на Република Северна Македонија во Европската Унија |
| Претседавач: | 1. Претседател на влада; |
| Заменик : | 2. Главен политички преговарач; |
| Членови: | 3. ЗПВРСМ и министер за одбрана;
4. ЗПВРСМ и министер за внатрешни работи; 5. ЗПВРСМ, задолжен за економски прашања и за координација со економските ресори; 6. ЗПВРСМ и министер за политички систем и односи меѓу заедниците; 7. Министерот за надворешни работи; 8. Министерот за финансии; 9. Министерот за правда; 10. Министерот за економија; 11. Министерот за животна средина и просторно планирање; 12. Министерот за земјоделство, шумарство и водостопанство; 13. Министерот за информатичко општество и администрација; 14. Главен технички преговарач; |
| 15. Секретар на комитетот;
16. Секретар на комитетот; 17. Заменик секретар; 18. Заменик секретар. |
|
| Останати членови: | По потреба во работата на Комитетот можат да учествуваат и други членови на Владата, членовите на Преговарачката група, раководителите на работните групи, како и други релевантни чинители. |
Табела бр. 1: Состав на Комитетот
[i] ЗПВРСМ и министер за одбрана; ЗПВРСМ и министер за внатрешни работи; ЗПВРСМ, задолжен за економски прашања и за координација со економските ресори; ЗПВРСМ и министер за политички систем и односи меѓу заедниците; Министерот за надворешни работи; Министерот за финансии; Министерот за правда; Министерот за економија; Министерот за животна средина и просторно планирање; Министерот за земјоделство, шумарство и водостопанство; Министерот за информатичко општество и администрација
[ii] Секретарите и нивните заменици се назначуваат од Владата на предлог на главниот политички преговарач, а по претходно остварена консултација со главниот технички преговарач.
[iii] Службен весник на Република Македонија бр.62/97 и 12/98