Главниот технички преговарач ги води преговорите за пристапување на Република Северна Македонија во Европската Унија на техничко ниво за сите поглавја од преговорите.
Главниот технички преговарач ги извршува должностите во Владата, како и во рамките на Мисијата на Република Северна Македонија при Европската Унија во Брисел.
Со цел непречено извршување на ангажманот, главниот технички преговарач е упатен и акредитиран како член на дипломатскиот персонал во Мисијата на Република Северна Македонија при Европската Унија во Брисел со статус кој соодветствува на статусот на дипломатското звање специјален претставник.
Во непосредна соработка со Секретаријатот за европски прашања, Главниот технички преговарач:
- Ги координира задачите на работните групи поврзани со пристапните преговори;
- Ја координира работата на работните групи при подготовката на аналитичкиот преглед и степенот на усогласеност на националното законодавство со правото на Европската Унија;
- Координира со изработката и ги одобрува извештаите за спроведување на аналитичкиот преглед и степенот на усогласеност на националното законодавство со правото на Европската Унија;
- Координира со изработката и ги одобрува извештаите за текот на пристапните преговори;
- Координира со подготовката и одобрува мислења, ставови и анализи поврзани со пристапните преговори;
- Координира со активностите за подготовка на работните групи поврзани со пристапните преговори во одделни поглавја;
- Во соработка со главниот политички преговарач ги утврдува потребните материјали за Државната делегација, а ги одобрува изработените материјали за Преговарачката група и
- Координира со процесот на комуникација и размена на материјали помеѓу Државната делегација и Преговарачката група и структурата за преговори на Европската Унија.
Во име на Преговарачката група, Главниот технички преговарач остварува комуникација со:
- Органите на државната управа и други државни органи и институции;
- Институциите на европската унија;
- Институциите од државите членки на европската унија и државите во процес на пристапување;
- Деловната заедница и стопанските комори, синдикатите, академската заедница, граѓанското општество и
- Други засегнати страни.
Главниот технички преговарач во име на Преговарачката група ја информира пошироката јавност за активностите во врска со преговорите за пристапување.